موقع ومنتدى مدرسة أحمد زويل الإعدادية بإدارة شمال الجيزة التعليمية
عزيزي الزائر / عزيزتي الزائرة يرجي التكرم بالدخول اذا كنت عضو معنا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك
شكرا
ادارة المنتدي

الأبنودى يهدى قصيدته ضحكة المساجين للمناضل علاء عبدالفتاح

استعرض الموضوع السابق استعرض الموضوع التالي اذهب الى الأسفل

الأبنودى يهدى قصيدته ضحكة المساجين للمناضل علاء عبدالفتاح

مُساهمة من طرف يوسف عطا في السبت 04 فبراير 2012, 10:24 am




تغازل العصافير.. قُضبانها
زنزانة لاجلَك كارهة سجّانها
دُوق زيّنا حلاوة الزنازين

على بُرشَها.. بتمِدّ أطرافك
سجّانك المحتار فى أوصافك
مهما اجتهدْ ماحيعرف انت مين

والشمس شعلة عند رافضة تغيب
وفكرها يودى معاك ويجيب
الشمس تحزن زى أى سجين

والليل نديم فى الصبر عالرحلة
بتغنى والليل فى السواد كحلة
وارث غناه معاناه من السابقين

فى العتمة عاتب مصر وداديها
إنت إللى روحك من زمان فيها
توأم فى لحظة عشق مولودين

طوبَى لكل المسجونين باطل
فى زمن.. بيخدعنا وبيماطل
يا شموس بتبرُق فى غُرَف عِتْمين

وخطوة الددبان ورا الشباك
صوت نعل يقضى الليل هناك وياك
سجانك إللى فى حاجة للمحامين

الحرب وإللى خاضوها بجسارة
كانوا مسلمين ياعم ونصارى
فإزاى نناصر دين وننكر دين

كل إللى زرعوا مابيننا سور الفرقة
وبيقسمونا فرقة تكرة فرقة
والنية مصر الواحدة تبقى إتنين

تحية لك ونا كاتبها بخطى
إدفع تمن حبك لأخوك القبطى
مع إننا فى الأصل قبطيين

هم اللى ماتوا فى ميدان الثورة
كانت دماهم حمرا ولا سمرة ؟؟
قول للى جايين يفرزا الدمين

الصرخة هادية بس هزة الكون
قال الغشيم للوردة خبى اللون
وإيش يفهم التور فى هوا البساتين

الشر فى طرف الميدان يسكر
والفجر يطلع تحجبه العسكر
ونت بتكتب سكة الجايين

الثورة نور وإللى سرقها خبيث
يقف مابين شهدا وبين محابيس
والدم لسة مغرق الميادين

مابيتوبوش ولا إللى فات علمهم
مابيسمعوش فى الدنيا إلا كلامهم
مالهومش فى حوار النبات والطين

إحنا نقول أيوة يقولوا لأ
وفى الحقيقة ياعم ليهم حق
مانتو خلقتوا الثورة بالتدوين

شوف الوشوش حمرا تكب الدم
وحنا سمار الوش تركة هم
والفرس ف وطنا ورث م الوارثين

مش منا .. شوف اللون وحس اللغوة
وشوش أجانب على الأقل تراكوة
جيشهم رحل وفضلوا دول لابدين

العمدة يتقل قد ملو كروشه
بطيخه الأقرع هاج ومد عروشه
وله غفير صوت زعقته بضميرين

نطلع من الساقية نقع فى طاحون
فإشهد يا وطنى عللى فينا يخون
ياللى إنت ماسك دفتر الخاينين

ومصر عارفه وشايفه وبتصبُر
لكنّها ف خَطْفِةْ زمن.. تُعْبُر
وتستردّ الإسم والعناوين

وكل ما الصوت البليد بلد
لا تبتئس م الظلم وتجلد
مين ده إللى يطفى شعلة الصادقين

واللى يُقف فى وش ثوّارها
ما حيورث إلاّ ذلها وعارها
واللى حيفضل.. ضحكة المساجين

يارب جملنى بقصر القول
المخ داير والفؤاد مقتول
خايف أئن لأحزن المحازين

سامعة أنينى وساكتة ليه يا مصر
الحلم فارشين بيه فى سوق العصر
قدام عنين إللى مالهش عينين

زنزانة واخدة دروس قدام فى الصمت
وعرفتك من قبل مانت دخلت
صمتك على صمت الحجر لايقين

الحزن طايح فى قلوبنا.. بجدّ
ما فضلْش غير الشوك فى شجر الورد
غِلِط الربيع ودخل فى أغبى كمين

ياللى دمعتى رجعت دمعة
الدنيا شايفة كلها وسامعة
وإللى سرق هايخبى شيلته فين ؟

ولدك ضياء الفجر بمقاسه
ووطنا عارف عزوته وناسه
أجيال بترحل والجداد جايين

ياوليدى ميل قول لإخوانك
تانى رجع من خان وأهه خانك
والسجن مش شبعان شباب صالحين

غزلان ووقعت فى ظلام غابة
قضبان وليها ضحكة كدابة
والضحكة كاشفة عن سنان صفرين

أما اللى خان وطنَك وأوطانى
م الهيبة.. حاطّينه ف قفص تانى
يصحى وينعس والجميع واقفين

وفى انتظار تيأس مع الأيام
غيرك فى قفصُه بيضربوله سلام
وإحنا الجزم قبل الكفوف جاهزين

يا دى الميزان اللى طِلعْت لفوق
بينزِّلوك بالعافية أو بالذوق
دول مش بتوع الصدق فى الموازين

ويا مصر.. هَدِّى وانتى بتفُوتى
الصوت فى صمتُه.. أعلى من صوتى
آدى السجين اللى ما باتش حزين

لسة إللى حكمونا أهم حاكمين
بينوبوا عنهم بس ناس تانيين
وإنتوا أسرى علبة السردين

بيحلموا يعودوا إلى ما كان
وقضاه تحررهم فلان وفلان
وكأن لا ثورة ولا حسنين

ماهو شباب الثورة بقى مسجون
ولا عاد قصاد الخونة إلا دخون
تاه الميدان الحر فى الميادين

نطمس معالم ثورتك يا شباب
أهه زى صفحة بتتمزع فى كتاب
والدنيا تهدى ويرجعوا الغايبين

ولا كانش فى ثورة ولا ثوار
ولا شعب مصر الغاضب الجبار
لا حداشر أكتوبر ولا عشرين

يا عم اقعد بسّ واشرب شاى
الدنيا ماشيه وشعبنا نسّاى
والبركة فى الشاشة وفى الجرانين

واذا هوْهوُوا.. قوم إعلن الأحكام
وكل بُق.. تلجّمه.. بلجام
ومش حتغلب تطبخ القوانين

ونت قمر سهران مع الصحبة
حالمين ببكرة وجنته الغايبة
ومتبتين فى الحلم مش صاحيين

ويا وردة البساتين يا مصرية
راية بترمى الضل ع المية
والنيل مموجها رايات تانيين

بكراك لا حيثيات ولاها نصوص
ياشب ياللى ليك صباح مخصوص
بتفرقه بالحتة ع الملايين

وهاتفضل العصافير على الشبابيك
والفجر يستنى أدان الديك
وطن وحلم وفجر متعانقين

فى المحكمة والوقفة وقفة ند
نفس السؤال بالصمت إنت ترد
وتعود وترمى الجتة ع البطاطبن

أغراب وأقراب كلها فاهمة
صمتك فى ذاته هو ده التهمة
فى زماننا كل الشرفا متهمين

دول من بلدنا ولا من غيرها
قول للى أكلوا خبزها و طيرها
سامعة الضحية سنة السكاكين

بيجردوا الثورة من العشاق
كما تصبح الشجرة بلا أوراق
القلب أخضر والعيدان ناشفين

شهدا وجرحى والحساب يتقل
وبهية حلة شعرها بتسأل
كل العباد عللى قتل ياسين

وأرجع وأقول من تانى للسجان
زوم وإتنفخ وأنفخ كمان وكمان
ولا يوم هاتغلب ضحكة المساجين

الثورة نور.. واللى طفاها خبيث
يرقص ما بين شُهدا وبين محابيس
والدم لسّه مغرَّق الميادين

الحزن طايح فى قلوبنا.. بجدّ
ما فضلْش غير الشوك فى شجر الورد
غِلِط الربيع ودخل فى أغبى كمين

ومصر عارفه وشايفه وبتصبُر
لكنّها ف خَطْفِةْ زمن.. تُعْبُر
وتستردّ الإسم والعناوين

واللى يُقف فى وش ثوّارها
ما حيورث إلاّ ذلها وعارها
واللى حيفضل.. ضحكة المساجين

ومصر عارفه وشايفه وبتصبُر
لكنّها ف خَطْفِةْ زمن.. تُعْبُر
وتستردّ الإسم والعناوين

_________________
===============================================================================

للتواصل على الفيس بوك

أرسل طلب صداقة

من هنا
avatar
يوسف عطا
Admin

ذكر نقاط : 3935
عدد المساهمات : 449
تاريخ التسجيل : 29/03/2009
العمر : 49

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى